អ្នកជំនាញជឿជាក់ថា កម្ពុជានឹងទទួលបានឱកាសពង្រីកពាណិជ្ជកម្មកាន់តែប្រសើរ ក្រោយចប់ជម្លោះព្រំដែនជាមួយថៃ
សង្រ្គាមនៅតាមព្រំដែនជាមួយថៃ នាពេលកន្លងមកនេះ បានបង្កទុក្ខលំបាក និងមានផលប៉ះពាល់ដល់ជីវភាពពលរដ្ឋខ្មែររាប់សិបម៉ឺននាក់ និងបណ្ដាលឱ្យមានពលរដ្ឋស៊ីវិលស្លាប់៣២នាក់ និងរងរបួស៩៥នាក់ ខណៈហេដ្ឋារចនាសម្ព័ន្ធស៊ីវិលជាច្រើនទៀតបានរងការខូចខាតធ្ងន់ធ្ងរ។ មកដល់ពេលនេះ កម្ពុជា និងថៃ កំពុងអនុវត្តបទឈប់ និងត្រូវបានរំពឹងថា សន្តិសុខតាមព្រំដែននៃប្រទេសទាំងពីរនឹងទទួលមានស្ថិរភាពឡើងវិញ។ ទន្ទឹមនេះ អ្នកជំនាញជឿថា កម្ពុជានឹងទទួលបាននូវជំនួយពីប្រទេសជាដៃគូ ដើម្បីស្ដារ និងអភិវឌ្ឍន៍សេដ្ឋកិច្ចឡើងវិញផងដែរ។
ដោយឡែកលោកបណ្ឌិត ហុង វណ្ណៈ អ្នកសិក្សាស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា កត់សម្គាល់ឃើញថា នៅអំឡុងពេលដែលកម្ពុជា មានបញ្ហាប្រឈមជាមួយថៃ នៅប៉ុន្មានថ្ងៃកន្លងមកនេះ ដំណើរការដោះដូរពាណិជ្ជកម្មជាមួយអន្តរជាតិ ពុំមានអ្វីប្រែប្រួលគួរឱ្យកត់សម្គាល់នោះទេ។ ទន្ទឹមនេះ អ្នកជំនាញរូបនេះ ជឿជាក់ថា នៅពេលតំបន់ព្រំដែនកម្ពុជា មានស្ថិរភាព នោះបណ្ដាប្រទេសជាដៃគូនានានឹងជួយស្ដារហេដ្ឋារចនាសម្ព័ន្ធដើម្បីបម្រើដល់ការអភិវឌ្ឍសេដ្ឋកិច្ចឡើងវិញ។
ជាមួយគ្នានេះ លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព យល់ឃើញថា ដើម្បីឱ្យការអភិវឌ្ឍនៅតាមព្រំដែនមានស្ថិរភាពយូរអង្វែងលុះណាតែកម្ពុជា និងថៃ បញ្ចប់ជម្លោះ និងវិលមករកសន្តិភាពឡើងវិញ។ សម្រាប់អ្នកជំនាញរូបនេះ កម្ពុជាគួរកៀរគរបណ្ដាក្រុមហ៊ុនរបស់លោកខាងលិចឱ្យមកអភិវឌ្ឍ និងបោះទុនវិនិយោគនៅតាមតំបន់ព្រំដែន ព្រោះវាអាចជារបាំងសុវត្ថិភាពមួយសម្រាប់កម្ពុជាផងដែរ។
សូមបញ្ជាក់ថា សង្រ្គាមនៅតាមព្រំដែនជាមួយថៃ កន្លងមកនេះ បានបង្កផលប៉ះពាល់ដល់ជីវភាពពលរដ្ឋខ្មែររាប់សិបម៉ឺននាក់ និងបណ្ដាលឱ្យមានពលរដ្ឋស៊ីវិលស្លាប់៣២នាក់ និង៩៥ នាក់រងរបួស ខណៈហេដ្ឋារចនាសម្ព័ន្ធស៊ីវិលជាច្រើនទៀតបានរងការខូចខាតធ្ងន់ធ្ងរ៕
នាំមកជូនដោយ៖ Ankgor7
អ្នកជំនាញជឿជាក់ថា កម្ពុជានឹងទទួលបានឱកាសពង្រីកពាណិជ្ជកម្មកាន់តែប្រសើរ ក្រោយចប់ជម្លោះព្រំដែនជាមួយថៃ
views